اللي طيرناها
فرج بصلو
وليش ما تحكيني ياقدح عَ أول بستان
كان في أصص مليئة بعبق الريحان
ودالية فرشت عَ البئر أغصان أغصان
وكنت أنا عند الشباك الملون أول إنسان
وليش ما تحكيني ياهوى عن صيفية
قطعت نفسنا من قلة الهوا
نحنا والقطط
على مدار الحوش
بنتدلل سوا
وبعدها لما تبخر الشوب وحط الهوا
اول مطر عبق الأرض بشذى التراب
ومن بعيد غرّ ب الغراب
ومن بعيد عادت سنونوات
وحطت درر بسقف البيت
ومنها فراخ من أول يوم
صارت تغني
لأول بيت
بداية الجوى
وليش ما تحكيني ياليل عن أحلام صغار
مثل نجوم غطاها الغيم
وتخبت بالجام
وطافت عَ وِش الميه
وحشناها بالدلو
وفرحت لما شربناها
مع شاي
ومع شوربات العدس
والرز
والورد اللي كان خدود الدنيا
والنوار
ثلج بثلج
على باب
الدار
والوحل
ورياش الدواجن
البرامات
وطيارت الورق
اللي طيرناها ليل نهار
نعست ياقدح
ولا
شو صار؟!.
